ಘಂಟೆ ಗಣಪತಿ

ಶ್ರೀ ದೇವರ ನೂತನ ಕಟ್ಟಡದ ಶಿಲಾನ್ಯಾಸವನ್ನು ಶ್ರೀ ಶಕೆ 1913 ನೇ ಪ್ರಜಾಪತಿ ಸಂವತ್ಸರದ ಮಾಘ ಶುಕ್ಲ ನವಮಿ ಗುರುವಾರ ದಿ.13-2-1992 ರಂದು ಶ್ರೀ ಶ್ರೀ ಶ್ರೀಮದ್ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳ ಅಮೃತ ಹಸ್ತದಿಂದ ನೆರವೇರಿಸಿದರು. ಅಂದಿನಿಂದ ಆಡಳಿತ ಮಂಡಳಿಯ ಜೊತೆಗೆ, ಸ್ಥಳೀಯರ, ಭಕ್ತರ ಸೇವಾಕಾರ್ಯದೊಂದಿಗೆ ಕೆಲಸ ಪ್ರಾರಂಭಗೊಂಡು ಮೂರುವರ್ಷದಲ್ಲಿ ಸುಂದರ ದೇವಸ್ಥಾನ ನಿರ್ಮಾಣಗೊಂಡಿತು. ಶ್ರೀ ದೇವಸ್ಥಾನದ ಶಿಖರ ಪ್ರತಿಷ್ಠೆ ಹಾಗೂ ಸಂಪ್ರೋಕ್ಷಣಿಯನ್ನು ಶ್ರೀ ಶಕೆ 1916 ನೇ ಬಾವ ಸಂವತ್ಸರ ಮಾಘ ಶುಕ್ಲ ತ್ರಯೋದಶಿ ಸೋಮವಾರ ದಿ|| 13-2-1995 ರಂದು ಶ್ರೀ ಶ್ರೀ ಶ್ರೀಮದ್ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳ ಅಮೃತ ಹಸ್ತದಿಂದ ನೆರವೇರಿಸಿದರು. ಶ್ರೀ ಸಿದ್ಧಿವಿನಾಯಕ ದೇವರ ಕೃಪೆಗೆ ಪಾತ್ರರಾಗಿ ತಮ್ಮ ಮನದ ಸಂಕಲ್ಪ ನೆರವೇರಿದ ಕಾರಣ ಭಕ್ತಾದಿಗಳೇ “ಘಂಟೆ ಗಣಪತಿ” ಎಂಬ ಹೆಸರನ್ನು ಜಗದ್ಜ್ಜಾಹಿರ ಗೊಳಿಸಿ,ಪ್ರತಿದಿನವು ಸಾವಿರಾರು ಸಂಖ್ಯೆಯಲ್ಲಿ ಬಂದು ಶ್ರೀ ದೇವರಲ್ಲಿ ಬೇಡಿಕೊಂಡು ಹರಕೆಯನ್ನು ಪೂರೈಸುತ್ತಿದ್ದಾರೆ.

ಭಕ್ತಾದಿಗಳು ಬರುವ ಪ್ರಮಾಣವು ಎರಿಕೆಯಾದ್ದರಿಂದ ದೇವಾಲಯದ ಪ್ರಾಂಗಣ ನಿರ್ಮಿಸಬೇಕೆಂದು ಹಾಲಿ ಆಡಳಿತ ಸಮೀತಿ ತಿರ್ಮಾನಿಸಿ ಶ್ರೀಗಳ ಮಾರ್ಗದರ್ಶನದಂತೆ ರೂಪುರೇಷೆ ಹಾಕಲಾಯಿತು. ಶ್ರೀ ದೇವರ ನೂತನ ಚಂದ್ರಶಾಲೆ ಶಿಲಾನ್ಯಾಸವನ್ನು ಕಾರ್ತಿಕ ಬಹುಳ ಸಂಕಷ್ಟ ಚತುರ್ಥಿ ದಿ.2-12-2012 ರಂದು ಶ್ರೀ ಶ್ರೀ ಶ್ರೀಮದ್ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳ ಅಮೃತ ಹಸ್ತದಿಂದ ನೆರವೇರಿಸಲಾಯಿತು. ಶ್ರೀ ದೇವಸ್ಥಾನದ ಗರ್ಭಗುಡಿ ಸುತ್ತ ಸುಂದರ ಕೆತ್ತನೆಯ ಶಿಲಾಮಯ ಪಂಚಾಂಗ,ಅದರಮೇಲೆ ಮರದಕೆತ್ತನೆಯ ದಳಿ, ತಾಮೃ ಹೊದಿಕೆಯ ಮಾಡು, ಪ್ರಾಂಗಣವನ್ನು ಶಿಲಾ ಕಂಬದಿಂದ ಮಾಡಲಾಗಿದೆ. ಶ್ರೀ ದೇವಸ್ಥಾನದ ಗರ್ಭಗುಡಿ ಹಾಗೂ ಘಂಟೆ ಮಂಟಪದಲ್ಲಿ ಕರ್ಣಮುಚ್ಚಿಗೆ ಮಾಡಲಾಗಿದ್ದು ಸೂರ್ಯಮಂಡಲ,ರಾಶಿ,ನಕ್ಷತ್ರ ಮಂಡಲ ಕೆತ್ತಲಾಗಿದೆ. ಕೆತ್ತನೆಯ ಶಿಲಾಮಯ ಪಂಚಾಂಗಕ್ಕೆ ಆನೆಗಳ ಸಾಲು,ಘಂಟೆಯ ಮಾಲೆಯನ್ನು ಕೆತ್ತಲಾಗಿದೆ. ಮರದಕೆತ್ತನೆಯ ದಳಿಗೆ ಗಣಪತಿ ಪಂಚಾಯತ,ಮುದ್ಗಲಪುರಾಣದ ಮೂವತ್ತೆರಡು ಗಣಪತಿಯ ಚಿತ್ರಣ, ಒಂದು ನೂರಾ ಎಂಟು ನಾಟ್ಯಬಂಗಿ, ಯೋಗ ಮುದ್ರೆಗಳನ್ನು ಕೆತ್ತನೆ ಮಾಡಲಾಗಿದೆ. ಚಂದ್ರಶಾಲೆಯ ಹದಿನೆಂಟು ಕಂಬಗಳಿಗೆ ರಾಜ್ಯದ ಮತ್ತು ಹೊರಾಜ್ಯದ ಹಾಗೂ ವಿದೇಶದ ಪ್ರಸಿದ್ಧ ದೇವಾಲಯದ ಗಣಪತಿಯ ಚಿತ್ರಣವನ್ನು ಕೆತ್ತಲಾಗಿದೆ.